[遊記-2]探索另一顆星球 - 冰島

Day 2 早上9點食完早餐，10點就出左車啦，今日第一個景點係Eldhestar horse farm，上網做左research呢間係好多tour指定既馬場，離市中心40mins左右。途中見到有好多車停左係避車處唔知影咩，我地八掛又停埋一份，一落車；

哇，正啊。撞正前幾日落雪，Iceland大部分山變哂雪山，令冰島任何地方都成為景點。

因為冰島馬一直比人地話好MK，所以見順路就去呢個馬場睇下。一去到馬場，好多馬係兩個圍欄入面，一個係比BB馬，另一個係比成人馬身型大隻d，另外有部份馬就係門口準備比人騎。

好可愛，佢地完全唔怕人，一行近個欄，D馬就即刻沖過黎以為有野食，不過一落車好臭好大陣馬屎味～同埋佢地個身其實都幾污糟，跟住可能因為個圍欄太細，你會見到D馬成日係到打架好搞笑。

馬場嘅職員好nice, 就算我地無book tour佢地都主動走過黎傾計，教你點摸D馬，如果你唔怕既話可以摸佢地D下巴，佢地會覺得好爽。係馬場玩左一個鐘就上車繼續去Golden Circle。

第二站係人為稱秘景瀑布 Bruarfoss waterfall，呢個景點真係好難揾，GPS去到附近就show唔到小路，小路又好多坑，加上條路唔係正式既馬路，搖下搖下搞到要揸好慢同好頭暈。我地一路跟著前面D車行，行左10幾分鐘之後覺得唔對路就求其停左係人地屋企。

一落車，哇，正啊喂。

係人地屋企門口影到咁上下都係搵唔到條瀑布係邊，最後放左部Drone上去一路行一路搵路，終於皇天不負有心人，比我地行到去個秘景瀑布，好靚啊，呢到遊客唔係特別多，可能真係好難搵，同好辛苦，應該好多人由大路轉左入黎小路之後覺得唔對路就走左。

睇完瀑布之後就揸去Gullfoss，事關上次已經去過Gullfoss，所以主要帶我家人睇下iceland最大既瀑布。

因為好近市區瀑布好多遊客係到，本身可以行落樓梯到近D睇瀑布，但係今次條路積哂雪封左唔比行，我上次去d圖：

Lunch我地就去左gullfoss個tourism centre，行呢條樓梯上去。Gullfoss有兩個carpark既，一個就係上面tourism centre，一個就係樓梯下面，我自己覺得停係下面個carpark方便d。

佢地呢到個羊肉湯幾好飲嫁好足料，又係送麵包同任添，但係都成hkd200。

個tourism centre都好大，好多souvenirs同凍天衫賣，同埋個餐廳都幾大，湯就基本野黎，間間餐廳都有，但係佢呢到有pizza同D sandwiches，所以大家plan行程個陣都可以係到食埋lunch。最後比我搵到張我覺得最靚既post card，極光，銀河，冰河湖，完美配合！！！

食完lunch我地就去左我覺得好伏既景點--Haukadalslaug Hot Pot噴泉，噴泉位置係bruarfoss同gullfoss中間，所以好多day tour會一次過去哂呢D景點。 係car park一路行去噴泉周圍都係好多水坑keep住冒煙係幾得意既。本身諗住skip左呢個景點，事關同我自己plan既行程delay左好多，但係家人話既然黎到順便睇埋啦。

行5-10mins到就會去到最大個個噴泉，唔洗怕唔識路入黎，因為好多人圍住個窿等佢爆，個個就係最大既啦，個噴泉隔10mins左右就會噴一下，隔半個鐘就會噴一次大。你一見到佢好似水滾咁就知差唔多爆嫁啦。多數你睇到佢噴一次大就可以走lol所以個景點我覺得幾無聊。

睇完噴泉再行埋car park隔離間souvenirs shop已經5點幾，跟著我地就直踩去Vik鎮 Vik是在冰島很南方的一個小鎮，全鎮人口不過600人，好多人在行程安排上Vik小鎮都是路過，睇完黑沙灘同個教堂之後，就會揸去下一個城市。但係我就plan左回程返town先行黑沙灘既。

揸到去vik已經差不多日落哂，因為間餐廳原來係教堂附近，所以我地上左Vik i Myrdal Church教堂影左相先 。

教堂出面有好大個car park任泊，揸上少少有條小路去教堂上面個墳場，就係Postcard個view啦，不過大家揸上去既時間小心d因爲條路好斜同無防撞欄，一炒車就會連車碌落山嫁啦。

事關個日係我媽生日，所以我地去左Sudur Vik呢間餐廳食dinner， Sudur Vik在vik係幾出名幾餐廳，評價幾好，係tripadvisor排第一。餐廳係二樓，不過都略細，我地7點9去到餐廳，一入到去，又係勁多人排緊隊，但係鬼佬食飯時間偏早，好好采我地等左4個字就有位。

Menu唔係特別多選擇，無最常見嘅意粉，pizza算係最多choices。 我地嗌左個龍蝦湯，牛扒，pizza同chicken curry rice，出奇地，個咖哩鷄飯超好食，但係個飯比較細，各位去食記得加飯~龍蝦湯都係略咸，牛扒黎到我地先醒起order個陣waiter無問要幾成熟，心諗大獲了。最後個扒應該得3成熟，加上唔係鐵版，老實說麻麻地好食。Pizza就正正常常啦。賣單又係差唔多hkd800-1000 食完飯上返去個教堂上面影夜景，

本身已經知今晚成晚都係超好天同極光指數有4，琴晚得我同我女友去追光，因為兩老浸完溫泉好攰，所以影完之後同兩老講叫佢地望上個天， “個D就係極光啦，你地睇下” “吓？咁嫁咋？” “係啊，都話左好似睇緊雲嫁啦” “哇，真係搵鬼笨”

跟著幫佢地同極光合照完，自己又影D呃like相就揸多個幾鐘就返到酒店，因為唔想太夜返酒店同埋係噴場到影始終唔係咁好。

今晚我地住Fosshotel Núpar hkd1400包早餐，因為夜晚揸車同埋iceland highway無街燈，所以間酒店幾難搵，好采佢係juntion放左個勁細既路牌，如果唔係真係要係車過夜 ，所以建議大家唔係夜晚先checkin，盡可能晏就揸左去酒店先，認下附近D路先。

呢間酒店係我Iceland住過既最靚， 好摩登，幾舒服。佢每一間房都有附加既門可以直接出酒店，方便你出去睇極光唔洗下下經酒店走廊。同埋間酒店得一層，所以個走廊好的長，行好遠先去到counter。

重頭戲黎啦！！！頭先都講左今晚好好天同極光指數高，我地一到酒店，已經見到好多人企哂係酒店門口係咁望住個天，所以我地11點幾checkin完放底行李之後著返厚d衫就行出門口瘋狂影相啦。 撞正lady aurora大爆發，一出酒店抬頭望成個天都係綠色，好開心啊好感動啊！

今晚完完全全感受到郊區同市區既分別，同樣天清無雲，同樣極光指數都係4，但係好明顯因爲無光害，郊區既極光我係真係可以肉眼睇到係綠色，同埋郊區構圖易好多。

不過我地酒店個位好食風，大風到個人都企唔穩，兩老睇左30分鐘到就頂唔順返左入房取暖，而我就行左去酒店另一邊擋左大部分風既地方繼續影，正當我影完一張試位既相之後發現，原來個background係雪山。

OMG成個構圖唔同哂即刻放得上神枱， 之後我自己影左陣同影左個Timelapse之後就叫返家人出黎幫佢地影返D靚相返去交差。

今晚total影左兩個鐘左右都覺得夠哂，加上北極光好似靜返好多，得返酒店頭頂一條，所以最後都返房沖涼瞓教lu

Day2完