[遊記-3]踏上這無盡旅途 - 冰島

Day 3

因為琴晚睇極光睇到2-3點先瞓，所以我地今日都瞓返多D時間，差下電先出門繼續行程。呢到個早餐我好鍾意食，可以自己整waffle自己加配料好正。

食完早餐之後，大約11點同酒店合照完就出車了。

今日個行程唔會特別chur，因為前兩日晚晚好夜先返到酒店好辛苦。今日本身plan左去Svartifoss waterfall，冰川，Glacier Lagoon，diamond beach同Hofn龍蝦村，但係上網search左由Icelandic Mountain Guides Skaftafell行去Svartifoss来回要成2個鐘同幾辛苦，加上GPS唔識路skip左juntion都唔同我講，所以最後skip左呢個瀑布。

睇完人地D blog之後一直好想見識下iceland d冰川，所以我地見到有幾車由小路車入去冰川既方向就跟著人地行。點知一入小路，條路仲難揸過去bruarfoss個條，D水坑多成幾倍，架車chok到差d連早餐都嘔返出黎。一路揸一路左避右避，然後有架tour越野車好心提我地前邊有carpark你地可以行入去睇冰川。架車係載djoin左行冰川既人。

幾經辛苦揸到去停車場再行多15mins到，終於比我地見到冰川既盧山真面目！！

冰川再配埋個雪山就係無得頂，冰川前面有個半結冰既湖，好多人行完冰川都會去個湖到浸下佢地D爪鞋，不過我都唔知咩原因。之後我地發現左比tour guide條友fake左，carpark前邊行有條路可以揸入去冰川面前，條路仲要無乜水坑，個到都有個car park（條路大概係咁，沙石路黎，各位有信心可以征服佢既話不妨試試）

行到冰川前面啦，緊係解放部drone啦。老實講，係冰島放drone都幾恐怖下，一黎大風，有時如果逆風飛既話部機愈飛愈遠，最後要開sport mode先收到機，幾驚唔夠電返黎；二黎呢D郊區地方network唔係咁好，部drone一收唔到network就開始自己失控，所以我都唔敢飛得太遠。好好采呢個冰川有雪山頂住哂d風我先有信心飛。

冰川d紋好靚，不過頭個部分比D黑沙遮住左所以望落好污糟。好啦，係到睇左一個鐘到就行返carpark 拎車走人啦

揸多半個鐘左右就去到Jökulsárlón Glacier Lagoon啦，可能因為已經踏入春天，天氣開始回暖，個冰河湖得返3-4舊大冰，成個景點即刻平凡哂。第二日回程個陣仲誇張，一粒冰都無。

同我上次12月黎同一個地方差好遠，D冰係多到沖哂上岸。

講返我第一次黎冰島既經驗先，我上次黎Jökulsárlón Glacier Lagoon呢到係join由Reykjavik出發既day tour，mini tour bus會7/8點去到你酒店pickup你，之後再pick up其他團友，1架mini tour bus大概有10-16個人左右啦，佢個行程就係接完客之後一路揸一路停大概下就4點到去Glacier Lagoon，中途會停下Seljalandsfoss, Skógafoss同埋休息站，不過每次停既時間唔長，around 10-15 mins所以打完卡影事完相就要即刻上返車。

跟著個lagoon會停1 hour左右，之後去埋對面個diamond beach又係停45mins左右就直接揸返去Reykjavik嫁啦，大概夜晚11點返到酒店。另外如果你個日係好天既話，仲會同埋去追埋極光添。所以我覺得呢個tour都幾抵既如果你淨係想join one day tour，個tour大概hkd1500。

事關真係估唔到D冰咁快會溶哂 ，所以我地係到影左幾張相之後放埋部drone就走過對面diamond beach啦。不過放完drone之後先發現當地放左個指示牌係到話唔比放drone， 可能因為熱門旅遊景點，遊客比較多怕有危險。後尾亦都發現Seljalandsfoss, Skógafoss呢兩個瀑布都係唔比玩drone。

跟著其實Glacier Lagoon附近都仲有另一個Fjallsárlón，樣係冰河湖黎，大家黎到可以去埋Fjallsárlón睇下會唔會多冰d。

好多人都話靚既blue ice cave都係係Glacier Lagoon附近既，如果自駕遊既話可以自己揸到黎Lagoon再同tour滙合，不過blue ice cave只係10尾至3月尾有tour，因為summer icecave會開始溶雪好危險唔比入。同埋入一入ice cave睇一個鐘左右就要收hkd1500 per person所以我地爲左慳錢無join。

黎到diamond beach啦，同Glacier Lagoon一樣，d冰溶哂，得返一兩舊係岸邊….依家變到同黑沙灘無分別，乜都無，得堆望落污糟邋遢既黑沙 本身suppose應該係咁樣：

本身我最期待黎diamond beach影個d post card style既相，點知黎到得返兩舊冰，然後慘劇發生了。。。。

本身諗住係沙灘影下啲浪打落冰到既相，但係啲浪撞跌左個三腳架，半部相機浸左水1秒到。部機無哂反應拆左電同sd card出黎，拆左支鏡睇部機同鏡都無入水。之後拿拿林返酒店checkin 用清水清潔返部相機，可惜最後都係救唔返，依家send左新機去CS整。。。。。。不過都打定輸數嫁啦，網上好多都話浸完咸水一定無得救。成件事好采既係張SD card無事。

最新消息:部機救唔返 cs叫我拎去做回收 傷心事過後，揸多半個鐘就去到Hofn龍蝦村，Höfn小鎮係個漁港，漁業收穫係小鎮既主要收入來源，這小鎮既特產，就係新鮮出海打撈回來的蝦蟹。尤其是兩老好鍾意食海鮮，黎到龍蝦村緊係唔會放過Humarhöfnin呢間長期係tripadvisor第一名。

Humarhöfnin係hofn碼頭附近，門口有好多泊車位for食客，我地around 6點幾到餐廳，人唔係特別多，所以唔洗等位就入得。 餐廳menu好搞笑，一開頭望左勁耐唔知點解一D睇得明一D睇唔明，後尾發現佢原來係一行英文一行冰島文。。。。

最後我地order左兩個龍蝦pizza，一個龍蝦湯（係啊，又係嗌湯啊）因為無其他野好食lol同埋order左14號既A Grand mix of whole langoustine and tails，係混合拼盤，有龍蝦同龍蝦尾肉。

12號係成碟龍蝦尾肉，13係全龍蝦，好明顯我地係唔知12同13有咩分別所以order14兩樣都試下lol

嗌湯一定會跟埋餐包，鬆鬆軟軟幾好食，又係任添既。

龍蝦pizza，個pizza廚房佬9切既，一邊細一邊大，每塊pizza都有粒龍蝦肉。味道就一般般，不過佢應該係新鮮焗，個餅底脆扑扑幾好食。

龍蝦湯，同reykjavik個間個味完全唔一樣，我覺得好難飲，不過好足料好多龍蝦肉係湯入面，都係配包食正常d。

重點黎啦，A Grand mix of whole langoustine and tails。我自己就唔太鐘意海鮮既，所以就無乜點食，但係聽家人講D肉好”霉”應該係冰箱拎出黎，唔係新鮮既。以同樣價錢，香港D龍蝦好食好多。可能因為唔係旺季，D蝦唔新鮮掛，另外家人覺得呢隻咁既龍蝦好搵笨，個size同酒樓白灼蝦一樣，依家多左對鉗就叫龍蝦，傻的嗎？總括而言，呢餐出哂名既龍蝦餐只不過係比人誇大左，最後賣單hk1500。

食完呢餐垃圾既龍蝦餐之後，本身諗住去埋Stokksnes，人稱天空之鏡iceland ver. 但係由於諗諗下咪又係雪山，周圍都係啦，加上相機瓜左。所以check埋 天氣報告今晚無極光睇，就返酒店休息啦。

今晚住Lilja Guesthouse hkd1200，係Hofn附近，間酒店係由隔離農場一家人經營既，佢地養左幾隻mk馬同有隻牧羊/馬狗好QQ，隻狗會係餐廳門口行黎行去等人喂野食比佢。間酒店正正常常啦，唔係特別大，風景唔係特別靚，早餐都好一般，另外酒店出面好臭好大陣馬屎味。

Day 3 完